Godi Suwarna
SAJAK CIKARACAK
Sakeclak-sakeclak
Cikaracak lalaunan ninggang tarang
Laun-laun kalangkang peuray ngalakay
Sumarangsang kana ranggeuman halimun
Saketrok, saketrok
Cikaracak ngetrokan embun-embunan
Balung tunggal gumuruh nungtutan runtuh
Tina kujur nu nguluwut kuyumut dirungrum lukut
Sapicis, sapicis
Cikaracak gumiriming nyebit daging
Tuluy borok merejih satangtung tulang
Kumareumbing humaregung tengahing layung panungtung
Keclak deui, keclak deui
Cikaracak ninggang saban titincakan
Keclak deui, keclak deui
Laun-laun jadi jugang nganti bugang
*
Étti RS
NA TETELAR TAUN ANYAR
Naon deui nu rèk digalindengkeun ku urang ayeuna
Lagu cinta, lagu liwung, atawa hariring cikahuripan?
Antara rasa jeung mangsa
Sihorèng taya lalangsè nu masinikeun poè
atawa antara tangtung jeung waktu
Ukur kaitung ku ketugna jajantung.
Naon deui nu rèk digurit ku urang 'na tungtung langit,
sanggeus bèntang nu tingkaretip nungtut laleungit,
asmarandana, maskumambang, atawa durma?
Sabab antara karisi jeung tiiran wanci
lir angin jeung hiliwirna.
Antara subaya jeung cidra
lir kadeudeuh jeung geugeutna.
Mending urang nganggit dangding
Bari ngaroris caangna bulan
nu ngempray 'na peuting tingtrim
Susuganan urang weruh
mun kalebuh di laut nu liuh,
atawa urang nataan rumpaka
nu patolèksak dina kaca-kaca mangsa.
Susuganan urang salsè,
sabada tipoporosè ti poè ka tungtung poè.
Naon deui nu rèk digalantangkeun ku urang ayeuna,
sanggeus raga dibabandan kala?
Bandung, 1 Januari 1995
Acép Zamzam Noor
JALAN SATAPAK
Anteng mireng taun
Nu dilagukeun simpé
Galindeng semu alum
Tukangeun lalangsé
Anteng maca aweuhan
Nu dipedarkeun balébat
Samoja geus muguran
Katangén lapat-lapat
Anteng ngukur jarak
Nu diamparkeun wanci
Malipir jalan satapak
Nyukcruk urat nadi
2013
0 Komentar